പെരുന്നാളിന് എന്തോന്ന് നോമ്പ്!!!

കഴിഞ്ഞ ഒരു മാസം തടിയന്റവിട നസീറിന്റെ തിരുമൊഴികളുടെ കാലമായിരുന്നു. കളമശ്ശേരിയില്‍ ബസ് കത്തിച്ചതു മുതല്‍ അമേരിക്കയിലെ വേള്‍ഡ് ട്രേഡ് സെന്റര്‍ ആക്രമണം വരെ നസീര്‍ ഏറ്റെടുത്തു(ഏറ്റെടുപ്പിച്ചു). പേര് വെളിപ്പെടുത്താത്ത ഇന്റലിജന്‍സ് വൃത്തങ്ങളെയും പോലിസ് അധികാരികളെയും ഉദ്ധരിച്ച് കൊണ്ട് പത്രങ്ങള്‍ വിളമ്പിയ കഥകള്‍ വായിക്കുന്നുണ്ടെങ്കില്‍ നസീറിന് തന്നെ തോന്നുന്നുണ്ടാവും താനൊരു സംഭവമാണല്ലോ എന്ന്. അക്കൂട്ടത്തില്‍ മലയാളത്തിലെ ഒന്നാമത്തെ പത്രമാവാന്‍ മല്‍സരിക്കുന്ന മാതൃഭൂമിയുടെ എക്‌സ്‌ക്ലൂസീവ് ഒന്നു വായിച്ചു നോക്കൂ. എണ്ണത്തില്‍ കുറവാണെങ്കിലും മാതൃഭൂമിക്ക് തന്നെ കൊടുക്കണം ഒന്നാം സ്ഥാനം എന്ന് നിങ്ങള്‍ക്ക് തോന്നുന്നില്ലേ...